شه‌ممه‌ , 14 كانونی یه‌كه‌م 2019
دەستپێك / كوردستان / ئه‌نجومه‌نێ‌ ئاسایشێ‌ دناڤبه‌را یوسف بارزانى و مه‌نسور بارزانى دا ئاریشه‌ مه‌زنتر لێكرن

ئه‌نجومه‌نێ‌ ئاسایشێ‌ دناڤبه‌را یوسف بارزانى و مه‌نسور بارزانى دا ئاریشه‌ مه‌زنتر لێكرن

پشتى زێده‌ترى سێ‌ مه‌ها ژ پێكئینانا كابینا نه‌هێ‌ یا حكومه‌تا هه‌رێما كوردستانێ‌ بـ سه‌رۆكایه‌تیا مه‌سرور بارزانى , هه‌یا نها پوستێ‌ راوێژكارێ‌ ئه‌نجومه‌نێ‌ ئاسایشێ‌ نه‌هاتیه‌ ئێكلایی كرن و بـ پوست بـ ڤاڵایی مایه‌.

مه‌سرور بارزانى هه‌ر ژ ده‌ست بكاربونا خو وه‌ك سه‌رۆكێ‌ حكومه‌تێ‌ كار لسه‌ر وێ‌ یه‌كێ‌ كر مه‌له‌فا نه‌فتێ‌ ژده‌ست نێچیرڤان بارزانى بینیته‌ ده‌ر كو ئه‌ڤه‌ چه‌ندین كابینه‌یه‌ نێچیرڤان بارزانى و ئاشتى هه‌ورامى سه‌رپه‌رشتیا مه‌له‌فا نه‌فتێ‌ دكه‌ن و دهه‌مان ده‌م دا پوستێ‌ خو یێ‌ به‌رێ‌ بهێلیته‌ لژێر ده‌سهه‌ڵاتا خو و بۆ ڤێ‌ مه‌ره‌مێ‌ مه‌نسور بارزانى برایێ‌ خو ئاماده‌ كریه‌ بۆ وه‌رگرتنا پوستێ‌ راوێژكارێ‌ ئه‌نجومه‌نێ‌ ئاسایشا هه‌رێما كوردستانێ‌.

بـ ڤێ‌ یه‌كێ‌ نێچیرڤان بارزانى دێ‌ هه‌رئێك ژ ده‌سهه‌ڵاتێن نه‌فتێ‌ و ئاسایشێ‌ یێن هه‌رێما كوردستانێ‌ ژده‌ست دده‌ت و بـ ڤى ره‌نگى دێ‌ ده‌سهه‌ڵاتێن وى وه‌ك سه‌رۆكێ‌ هه‌رێمێ‌ دسنوردار بن.

ژێده‌ره‌كێ‌ تایبه‌ت كو ژبه‌ر هه‌ستیاریا بابه‌تى نه‌ڤیا ناڤێ‌ وى بهێته‌ ئاشكه‌راكرن بـ “بادینان پرێس” راگه‌هاند: چه‌ندین هه‌وڵ هاتینه‌ دان ژباڵ مه‌سرور بارزانى ڤه‌ تاكو مه‌سرور بارزانى یان هه‌ر كه‌سه‌كێ‌ دن یێ‌ نزیك خو بكه‌ته‌ راوێژكارێ‌ ئه‌نجومه‌نێ‌ ئاسایشێ‌ , به‌لێ‌ نێچیرڤان بارزانى رێگربوویه‌ و برایێ‌ خو “یوسف ئدریس بارزانى” وه‌ك به‌ربژێر به‌رامبه‌ر به‌ربژێرێ‌ مه‌سرور بارزانى دیاركریه‌.

ژێده‌رى ئاشكه‌راژى كر, مه‌سعود بارزانى سه‌رۆكێ‌ پارتى دیموكراتى كوردستان حه‌زدكه‌ت كورێ‌ وى مه‌نسور بارزانى ڤى پوستى وه‌ربگریت به‌لێ‌ ژبۆ راگرتنا به‌لانسێ‌ ناڤبه‌را كور و برازایی چ بریار لسه‌ر نه‌داینه‌ و هه‌یا نها پوستێ‌ راوێژكارێ‌ ئه‌نجومه‌نێ‌ ئاسایشێ‌ بـ ڤاڵایی مایه‌.

یوسف بارزانى برایێ‌ نێچیرڤان بارزانى یه‌ , د كابینا بوورى دا پوستێ‌ راوێژكارێ‌ سه‌رۆكێ‌ ئه‌نجومه‌نێ‌ وه‌زیران بۆ كاروبارێن نه‌فتێ‌ و وزێ‌ هه‌بو , بـ ئاشتى هه‌ورامیێ‌ بچویك دهێته‌ نیاسین و مه‌نسور بارزانى كورێ‌ مه‌سعود بارزانى یه‌ فه‌رماندێ‌ چه‌ند لیوایه‌كێن تایبه‌تێن پێشمه‌رگه‌یه‌ و به‌رپرسێ‌ به‌رێ‌ یێ‌ محوه‌رێ‌ خازر بوو.